برپ : اورہان پامک ، اے.آر داد

برپ۔
۔۔۔
اورہان پامک۔
۔۔۔۔
برپ گدارkarءِانگریزی رجانک “snow” انت کہ اردوءَ برپ ءِ نامءَ رجانک بیتگ۔ کتابی رنگءَ ہما انورءَ اشیءَ رجانک(2019 )کتگ۔ بلے من اشیءِ بنگیچی بھر ً دنیازاد ً (2005)ءَ ونتگ کہ فہمیدہ ریاضءَ رجانک کتگ۔ مرچی کہ پدا من ایشی ءَ زرت کہ وانان ئے دلءَ گوشت ایشیءِ ھمے بھرءَ رجانک بکن ئے بے سواب نہ بے۔ اگاں وھد رست بلکیں سرجمیں گدارءَ بکناں بلے ھمنچو کہ گوں من بیت پہ شما رجانک ئے کناں۔
۔۔۔
اورہان پامک ترک ندکار ءِ بارہءَ برطانیہءِ روتاک “انڑی پینڑنٹ” ءَھمے نبشتگ کہ نوکیں لبزانکءِ درستاں چہ تواناءُ زندگیں،اسیلّیں توارے۔ ” نیو اسٹیٹس مین “ءَ نبشتگ آئیءِ نبشتگین بے گواز ءُ جھلانک انت۔
آئیءِ نامدار بوتگیں اولی گدار منی نام سہر ( my name is red)انت کہ 1998ءَ نویسگ بوتگ۔ نوکیں گدار snowانت۔ اے گدار ترکیءِ زیکءُ مرچیگیں سیاستءَ گوں ھمگرنچ انت۔ گدارءِ کارست کریم الا کوشغلو استنبولءِ سیر لاپیں ھانوادےءِ ورنائیں شاعرے کہ نودربریءِ زمانگءَ کیمونسٹ پارٹیءُ سیاستءَ ھوار بیتگ۔ ترکیءَ کہ فوجی آشوب اتک بازیں کمیونسٹے گرگءُ بند کنگ بوت ،ءُ بازینے دراں ڈیھ کنگ بوت۔کریم ھم تتکءُ دراں ڈیھ بوت۔شتءُ جرمنیءَ سیاسی باھوٹے بوت۔
گدارءِ بنگیجءَ زانگ بیت کہ دوازدہ سالءِ دراں ڈیھ بیگءَ پد آوتی ملکءَ کہ کیت چارایت جاور بدل بیتگ انت۔نوکیں دورءُ زمانگے بندات بیتگ۔ اسلامی جنزءَ سرجمیں ملک پتاتگءُ پوناتگ۔ ترکیءِ ھاکم اے جنزءَماں دستءَ آرگءَ جھدءَ انت۔کریمءَ یک کوھنیں سنگتے سوج دنت کہ آ اتاترکءِ منّوگریں روتاک “دی ریپبلکن “ءِ جھگیر بہ بیتءُاناطولیہءِ کسانیں شھر کرسءَ بروت کہ اودءَ پردہ کنوکیں بازیں جنکےءَ وتکشی کتگ پرچا کہ آیاں سرکارءِ گوشگءُ پرمانءِ پدءَ چہ وانگجاھاں کَشّگ بوتگ۔ راستیءَ ھم ترکیءَ چوشیں یکءُ دو واکہہ بیتگ اتگ ات۔وھدے کریم چہ ارض روم (erzurum)ءَ پہ کرسءَ بسءَ سوار بیت گڑا برپ ءِ رچگ بندات بیت۔ برپ سرجمیں کسہءِ تہءَ میزان،میزانءَ رِچان کنت کہ چریشی گدارءِ نام ” برپ”ایر کنگ بیتگ۔ ھمے برپءِ رچگ اے کسانیں ھلک رنگیں شھرءَ دنیاءِ اے دگہ بھراں چہ گستا (بزاں راہ بند بنت)کنت۔
کریم زانت کہ کرس ءَ آئیءِ نودربریءِ زمانگءِ دوستدار یوپیک ھم ھمودءَ انت۔ءُ چیزے روچ بیت کہ آئیءَ وتی مرد مختار بےءَ چہ سہون گپتگ انت۔ دچار کپگءَ پد آئیءَ سما بیت کہ آزمانگءَ چہ یوپیکءِ آشکءُ لوٹوک انت پدا پمیشکا اتکگ کہ گوں آئیءَ سیر بکنت۔ یوپیک نہ آئیءِ گپءَ ھو کنت نہ اناں۔
اورہان پامک ءِاے گدارءِ سرءَ ھمنچو کہ گپ بوتگ چہ اشاں یکے ھمیش انت کہ آئیءِ درشانداب دستوفسکیءِ چہرگءَ جنت۔ آ اے وڑءَ کہ کرسءِ بیان مارا ” جرمءُ سزا ” ءِپیٹرز برگءِ ترانگءُ ھیالءَ دنت۔ اورہان چوناھا ھم دستوفسکیءِ مزنیں شیدائے۔ آئیءِ سرءَ ترکی زبانءَ باز کار ھم کتگ ئے۔ سرجمیں کسہءِتہءَ برپ نوکیں زانتءُ سماءِ درشانیءُ جھگیر انت۔
بیا نوں گدارءَ بنگیج کنیں۔
۔۔۔
برپءِ بیتواری۔
۔۔۔
کرس (قارص)ءِ سپر۔
برپءِ بیتواری ! ڈرائیورءِ پشتءَ نشتگیں مردءَ جیڑ ات اگاں اے لچھے بوتیں گڑا آئیءَ وتی اندرءِ مارشتانی سرگال ھمے کتگ ات۔ چہ ارض رومءَ درکپوکیں اے بس کہ دیم پہ کرسءَ رَوَگی ات ہمیش انت دمانکے بیت آئیءَ وتءَ آرتگ ءُ رسینتگ ات۔دو روچ پیش ھورءُ توپانی موسمےءَ سپر کنانءَ ہمیش انت نوکی بس اوشتجاہءَ سربوتگ ات۔
سپری بیگ ئے دستءَ اتءُبرپی چِڑّ ءُ چِکّلانی تہءَ ماندیانءَ جستءَ ات کرسءِ بس چہ کجا درکپیتءُ کدی روت انت۔یکےءَ ھال دات کہ کرسءِ بس سرگپتگءُ درکپگی انت۔ آکرءُ باکر آئیءَ بس درگیتک بلے کلینڈرءَسامانانی ایرکنگ(ٹوّل)ءِ جاگہ بستگ ات۔ مئے مساپر گوں وتی بیگءَسرکپتءُ نشت۔ سہرچکیں اے بیگ آئیءِ پادانی دیمءَ ایر ات۔آدریگءِ دپءِ سیٹءِ سرءَ نشتگ ات۔ آئیءَ ناسی چکیں ھوری کوٹے گورءَ ات کہ آئیءَ فرینکفرٹءَ ماں کاف ہوفءَ پنچ سال پیش زرتگ ات۔
مارا اے گپ زانگ لوٹ ایت کہ آھمنچو روچ داں کرسءَ داریت اے وشرنگءُ نرمکیں کوٹ دو ھمنچو آئیءَ پشل کنت بلے چریشی آ وش ھم بیت۔
ھمے کہ بس راہ کپت ،مساپرءَ وتی چم کشءِ دریگءَ سک دات انت۔ نوکیں ندارگےءِ امیت ءَبدھالیں کسانکیں دکان، بیکریءُ ویرانگیں قہوہ جاھانی نیمگءَچاران ات کہ ارض رومءِ اے دستءُ آدستءَ زاھر ات انت۔ ھمے دمانءَ برپءِ رِچگ ھم بندات بوت۔
اے برپ باری استنبولءِ برپ باریءَ چہ ترند تر ات کہ وھدے آچہ ارض رومءَ پیداک ات آئیءَ دیستگ ات۔ اگاں آژندءُ دمبردہ مہ بوتیں آئیءَ ناچ کنانیں برپءِ پژلکانی چارانءَ اے گپ ھم زانتگ ات کہ آبرپءِ مزنیں توپانےءَ گوں دیم پہ دیم بیگی انت۔بلکیں آئیءَچو ھم بزانتیں اے سپرءَکہ درکپتگ آئیءَ چٹءَبدل کنت۔بلکیں پِرتراتءُ واتر بوتیں۔بلے آئیءَ چو کدی گمان ھم نہ کرتگ ات۔ روزرد بیگی ات پشکپتگیں روچءِ رژنائیءَ چارانءَوشی یے سما کنانءَ آئیءَ وتی کسانی یات اتک۔
مئے مساپر ءَ وتی کسانیءِ وشیءِ زمانگ استنبولءَ گوازینتگ ات۔
ھپتگے بیت آدوازدہ سالءَ رند وتی ماتءِ جنازہءَچہ جرمنیءَ واتر بیتگ ات ءُ اتکگ ات۔ چار روچ گوستگ ات کہ آئیءَماں دلءَ شَور کت کہ کرسءَ بروتءُ سرے بہ جنت۔
چنچو سال ھم بہ گوزیت اے شپءِ زیبائیں برپ باریءَ آ کدی چہ دلءَ برت نہ کنت کہ آئیءَوشیانی لزتےءِ سماءُ سماراں کتگ ات ئے کہ کدی چو آئیءَ استنبولءَ سما نہ کتگ ات۔ آشاعرے اتءُ یک رندے آئیءَ وتی لچھےءِ تہءَ نبشتگ ات آ لچہ دنیگا ترکیءِ وانوکاں سر نہ بیتگ ات۔ “مئےوابانی تہءَ برپ ایوک یک رندے رچیت۔ “۔بسءِ دریگءَ ڈن برپءَ وتی وابءِ برپءِ پیمءَبیتواریءَ سُبک ،سبُکءَکپانءَ چارانءَ یک انچیں وابےءِ امبازاں پترت کہ کرناں چہ ھمیشیءِ واھگدار ات۔ ھما واب کہ کودکیءِ یاتےءَ ششتگ اتءُ سلّہ کرتگ ات۔ھمے روچاں آ امیتءِ بے سوبیءِ گواچی بیتگ،ءُ ماں دنیاءَ ھستءُ مانگءِ واھگےءَ آئیءِ دلءَ ستکءُ وشمنّی یے ودی کتگ ات۔ چندیں دمان پیسر آئیءَ انچیں اوں گپے کتگ ات کہ باریں کدیگءَ چہ گوں آئیءَ نہ بیتگ ات۔آسپر کنانءَ جیڑان ،جیڑان ءَواب کپت۔
بیا ات آئیءِ ھمے بیتواریءَ مانا کنیں ءُ آئیءِزندءِ چندیں اندیمیں روچانی بارہءَ شمارا ھال بدئیں ۔آئیءَ ماں جرمنیءَ دوازدہ سال سیاسی باھوٹیءَ گوازینتگ ات بلے آچوشیں سیاسی سنگتے نہ ات۔ آئیءِ واھگ ایوک شاعری ات۔ ھمے آئیءِ زندءِ لوٹءُ پکار ات۔آچلءُ دو سالءِ سندءَ رستگ اتءُ دنیگا لُنڈ ے ات۔