بلیدہ(گدروشیا پوائنٹ) بلوچ اسٹوڈنٹس ایکشن کمیٹی ءِ نیمگ ءِ کیچ ءِ دمگ بلیدہ ءَ دو روچی فیسٹیولے بلیدہ زانشتی مراگش برجم دارگ بیتگ۔ دو روچی زانشتی مراگش ءِ جتائیں زانشتی ءُ وانگی بھر چوشکہ گُشتانک، پینل تران،گیدی کسہ ءُ نازینک، چاچ، بتل ءُ راجدپتری چکاس، ہامین ءِ پجار، ہالو، لیب لچہ، بلوچی لیب ءُ گوازی، کسمانک ءُ ڈائلوگ، کیرئیر کونسلنگ، شئیر ءُ شائری ءُ ساز ءُ زیملی بھر ءَ ہوار سائنس، دود ءُ ربیدگی، آرٹ ءُ کتاب اسٹال ہم اڈ دیگ بیتگ اَنت۔
مراگش ءِ بندات چہ بلوچ راجی سوت ءَ کنگ بوت، چہ آئی ءَ پد مراگش ءِ ایدگہ بھر جنزینگ بیتگ اَنت کہ آہانی تہ ءَ بلوچ ءِ وانگی نظام ءِ سر ءَ پینل تران ءُ بلوچ ءِ معاشی نظام ءِ سر ءَ ڈبیٹ تران، ھامین ءِ پجار، سائنس ءُ کیرئیر کونسلنگ ءِ سر ءَ گُشتانک، گیدی کسہ ءُ نازینک، چاچ ءُ بلوچ راجدپتر ءِ سر ءَ چکاس(قوئز)، زہگانی لیب لچہ، کسمانک ءُ گُشتانک، سائنس پروجکٹانی درنگازی، ادارہ ءِ کتاب گام ءُ کمپیوٹر ءِ پجار ءِ درنگازی، زہگانی دوچاپی، وانگجاہانی پچیں مائک سیشن کہ آئی ءِ تہ ءَ جتائیں وانگجاہانی نودربراں بھر زرتگ، اشاں ہوار دگہ بلوچی لیب ءُ گوازی کہ آہانی تہ ءَ ورّی، نوہ گَڈگی، ہشت چوکی، ٹِلاں گوازی ءُ پنچُکی ہوار بیتگ اَنت کہ زہگ ءُ ورنایاں بھر زُرتگ ءُ بلوچ ءِ دود ءُ ربیدگی لیب کُتگ اَنت۔ مراگش ءَ جتائیں اسٹال اڈ دیگ بیتگ اَنت کہ اشانی تہ ءَ آرٹ اسٹال، سائنس پروجکٹانی اسٹال، بلوچ دود ءُ ربیدگی اسٹال ءُ بلوچستان کتاب کاروان ءِ کتاب اسٹال ہوار بیتگ اَنت۔
مراگش ءَ بساک ءِ بنجاہی سنگت اُزیر بلوچ ءُ بالاچ بلوچ ءَ ہوار بلیدہ ءِ اُستاد، سیاسی ءُ لبزانکی مردم ہوار بیتگ اَنت۔
مراگش ءَ بساک ءِ بنجاہی سنگتاں تران کنان ءَ گوشتگ کہ ادارہ ءِ مدام جہد اِنت کہ آ بلوچستان ءِ ہمک ھَند ءُ میتگاں ہمے ڈولیں پُرمڑاہیں زانشتی مراگش اڈ بہ دنت ءُ یک انچیں زانشتی ماہولے ودی بہ کنت کہ چہ آئی ءَ بلوچ ءِ ہستیں ءُ آوکیں پدریچ سان بہ زیر اَنت ءُ وانگ ءُ زانگ ءَ گوں ہمگرنچ بیان ءَ وتی بودشتاں بہ تراش اَنت ءُ راجی زمہ واریاں پیلو کنان ءَ بلوچ چاگرد ءَ شعور ءُ زانشتی تک ءَ نہ تہنا باسما بہ کن اَنت بلکیں دیمروئی دیان ءَ یک مہکمیں منزلے ءَ سر بہ کن اَنت۔ بساک بلوچ ورنا ءُ نودربرانی ہما راجی درسگاہ اِنت کہ آئی ءَ چہ زانتکار ءُ بودناکیں ورنا ودی بنت ءُ بلوچ چاگرد ءَ وتی راجی بھرشتاں دیان ءَ راج ءَ سوبین کن اَنت۔
مراگش ءَ اتکگیں گُشتانکاراں جتائیں زانشتی، سیاسی، علمی ءُ لبزانکی سرہالانی سر ءَ تران کنان ءَ درائینت بلوچستان ءِ ایدگہ دمگاں ہوار بلیدہ ءَ ہم چہ بلوچ نودربر، استاد ءُ زانتکارانی جہد ءِ برورد ءَ پہ بلوچ چاگرد ءَ رُژنا پگریں راجی جہدے گندگ بیت کہ اشی ءِ آسر ءَ چاگرد ءِ تہ ءَ زانشتی سرپدی ءُ راجی سِنچ ءُ سما ودی بیتگ۔ ہمے پیم بساک ءِ اے زانشتی مراگہ آئی ءِ اوگام “جہد پہ زانشت ءُ یکمُشتی ءَ” ءِ عملی اکس اِنت کہ کُل استاد ءُ نودربر اتکگ ءُ یکمُشت اَنت ءُ پہ زانت ءُ زانشت ءَ جہد کنگ ءَ اَنت۔ ہمے مئے راج ءِ ورنایانی جہد ءِ برورد اِنت کہ آئی ءَ چہ مئے چاگرد ءِ پرْشتگیں بازیں بھرے نزارگ بیتگ ءُ یکجاہ کنگ بیتگ پہ راجی جوڈشت ءَ کاروان جُنزان اِنت۔
مراگش ءِ سرجمیں بھراں پد سوگاتی بھر ءِ تہ ءَ مراگش ءِ جتائیں بھراں بھر زُرتگیں زہگ ءُ ورنایاں ہوار وانگجاہانی اُستاداں سوگات دیگ بوت۔ آئی ءَ پد ساز ءُ زیملی بھر ءَ بلوچی کلاسیکی زیمرءَ ہوار امتیاز بلوچ،حمید بلوچ ءُ وھاب بلوچ ءَ گوں وتی وشیں توار ءَ سوت الہان کُت۔ مراگش ءَ جتائیں پِڑانی مردم اتکگ ءُ مزنیں کچے ءَ بھر اِش زُرتگ۔
ما بلیدہ ءِ سرجمیں وانگی ادارہانی منہ وار ایں کہ آہاں اے مراگش ءِ سوبین کنگ ءَ گچینیں کردارے پیلو کُت ھاس ہائی اسکول میناز بلیدہ، سنج اسکول میناز، گام اسکول الندور، مہلب اسکول الندور، کلکشان اسکول الندور، گُلبانک اسکول بٹ، رُژن اسکول میناز، تاہیر کمپیوٹر سنٹر بٹ کورءِ پشت، ساچ اسکول ءُ راہشون اسکول ءِ کُلیں سروک، استاد ءُ نودربرانی کہ آہانی بھر زیرگ مئے واستہ مزنیں سکینے اَت ءُ چہ اے تپاکی ءَ بلوچ چاگرد ءَ شعوری ءُ زانشتی پگر ءِ تالان کنگ ءَ گیش آسانی کئیت ءُ پہ ہستیں پدریچ ءَ رُژنائیں اُمیتے سہرا بیت۔
مراگش ءِ سرجمیں بھرانی یک یک ءَ سوبمندی ءَ گوں برجم دارگ ءَ پد دیوان دومی روچ ءَ آسر کنگ بیتگ۔
بنجاہی جارکش بلوچ اسٹوڈنٹس ایکشن کمیٹی
