پنجگور(گدروشیا پوائنٹ)ضلع پنجگور میں صحت عامہ کے شعبے میں ایک بڑا قدم اٹھاتے ہوئے ڈپٹی کمشنر پنجگور عبدالکبیر زرکون کی کوششوں سے ضلع کا پہلا جدید اور مکمل فعال تھیلیسیمیا سینٹر قائم کر دیا گیا۔ یہ مرکز ان درجنوں بچوں کے لیے امید کی نئی کرن بن گیا ہے جو موروثی خون کی بیماری تھیلیسیمیا میں مبتلا ہیں. افتتاحی تقریب میں ضلعی انتظامیہ، محکمہ صحت، سماجی تنظیموں اور مختلف محکموں کے نمائندوں نے شرکت کی۔ تقریب سے خطاب کرتے ہوئے ڈپٹی کمشنر عبدالکبیر زرکون نے کہا کہ یہ سینٹر ان معصوم بچوں کے لیے زندگی کی نئی امید ہے جو پہلے علاج کے لیے دور دراز شہروں کا سفر کرتے تھے اور بھاری اخراجات برداشت کرتے تھے، مگر اب وہ اپنے ضلع میں مفت علاج کی سہولت حاصل کر سکیں گے. ماہرینِ صحت نے بتایا کہ تھیلیسیمیا ایک موروثی بیماری ہے جس میں جسم معمول کے مطابق ہیموگلوبن پیدا نہیں کرتا، جس کے نتیجے میں مریض کو خون کی شدید کمی کا سامنا رہتا ہے. ان کے مطابق قریبی رشتہ داروں میں شادیوں کا زیادہ رواج اس بیماری کے پھیلاؤ کی ایک بڑی وجہ ہے. یہ منصوبہ ڈپٹی کمشنر عبدالکبیر زرکون کی ذاتی دلچسپی اور نگرانی میں مکمل کیا گیا. سینٹر میں تربیت یافتہ طبی عملہ، بلڈ بینک، جدید ریکارڈ سسٹم، ادویات کی بلاتعطل فراہمی اور مشاورتی خدمات کی سہولت فراہم کی گئی ہے. ڈپٹی کمشنر پنجگور نے کہا کہ یہ اقدام ضلعی صحت کے نظام کو مضبوط اور مربوط بنانے کی جانب ایک اہم قدم ہے. انہوں نے کہا کہ تھیلیسیمیا کے بارے میں عوامی سطح پر شعور اور آگاہی بڑھانے کی ضرورت ہے تاکہ اس بیماری سے بچاؤ ممکن ہو سکے. سینٹر کے بہتر انتظام کے لیے بورڈ آف گورنرز (BoG) بھی تشکیل دیا گیا ہے جس میں محکمہ صحت کے افسران، سماجی نمائندگان اور مریضوں کے والدین شامل ہیں۔ یہ بورڈ باقاعدگی سے اجلاس منعقد کر کے سینٹر کی کارکردگی کا جائزہ لے گا. ڈپٹی کمشنر عبدالکبیر زرکون نے جاوید میڈیکل سینٹر گرمکان اور دیگر کمیونٹی شخصیات کی فلاحی خدمات کو سراہا جو عوامی فلاح کے منصوبوں میں بھرپور تعاون کر رہے ہیں. انہوں نے یقین دہانی کرائی کہ ضلعی انتظامیہ اس منصوبے کے تسلسل اور بہتری کے لیے ہر ممکن تعاون جاری رکھے گی. یہ تاریخی اقدام پنجگور میں صحت عامہ کے شعبے میں ایک نیا باب رقم کرتا ہے ضلعی انتظامیہ کی عوام دوستی خدمت اور اصلاحاتی ویژن کی ایک روشن مثال، جس کا سہرا ڈپٹی کمشنر عبدالکبیر زرکون اور ان کی ٹیم کے سر جاتا ہے جنہوں نے جذبے اور ویژن سے ایک دیرینہ عوامی ضرورت کو حقیقت میں بدل دیا۔
