تربت(گدروشیا پوائنٹ)ٹیچنگ ہسپتال کیچ نے میئر بلخ شیر قاضی کے تعاون پر شکریہ ادا کرتے ہوئے اسے صحت کے شعبے کی بہتری کے لیے ایک اہم اقدام قرار دیا ہے۔ میئر بلخ شیر قاضی نے ہسپتال کے لیے 4.5 کے وی کا سولرائزیشن سسٹم فراہم کیا ہے، جس کے ذریعے دو ایئر کنڈیشنرز برائے کولنگ چل سکیں گے۔ اس کے ساتھ ساتھ انہوں نے مین فارمیسی میں ادویات رکھنے کے لیے نئی الماریاں بھی فراہم کی ہیں۔ ہسپتال انتظامیہ اور دفتر میڈیکل سپرنٹنڈنٹ نے اس قیمتی تعاون کو سراہتے ہوئے کہا کہ یہ اقدام مریضوں کو بہتر سہولیات فراہم کرنے میں مددگار ثابت ہوگا۔ میڈیکل سپرنٹنڈنٹ ڈاکٹر اے وحید بلوچ نے اس موقع پر کہا کہ اس طرح کی معاونت مکران میں صحت کی سہولیات کو مزید مضبوط بنانے میں کلیدی کردار ادا کرے گی۔ انہوں نے امید ظاہر کی کہ مستقبل میں بھی میئر بلخ شیر قاضی سمیت دیگر اسٹیک ہولڈرز صحت کے شعبے میں تعاون کا سلسلہ جاری رکھیں گے تاکہ عوام کو معیاری اور مؤثر طبی سہولیات فراہم کی جاسکیں۔
