تربت(گدروشیا پوائنٹ)یونیورسٹی آف تربت کے سوشیالوجی ڈیپارٹمنٹ نے ایک یادگار الوداعی پروگرام کا انعقاد کیا، جس میں فارغ التحصیل طلباء کو شاندار انداز میں رخصت کیا گیا۔ تقریب کا آغاز تلاوت کلام پاک سے ہوا، جس کے بعد طلباء نے مختلف تخلیقی سرگرمیوں کے ذریعے اپنی صلاحیتوں کا مظاہرہ کیا۔ ان سرگرمیوں میں گانے، بلوچی دوچاپی، ٹیبلو، ڈرامہ، تقاریر، سینئر طلباء کے ساتھ پینل انٹرویوز اور دیگر فنکارانہ پرفارمنس شامل تھیں۔ سینئر طلباء نے کیمپس میں اپنے وقت کے تجربات اور یادیں شرکاء کے ساتھ شیئر کیں، جس نے تقریب کو مزید جذباتی اور یادگار بنا دیا۔ شعبہ سوشیالوجی کے چیئرپرسن ڈاکٹر محمد یٰسین نے الوداعی تقریر میں طلباء کو حوصلہ افزائی اور تعلیم کے تسلسل پر زور دیا۔ انہوں نے فارغ التحصیل طلباء کو مستقبل میں اپنے مقاصد کے حصول کے لیے محنت اور عزم کا مشورہ دیا۔ میوزیکل سیشن نے تقریب کی رونق کو دوبالا کر دیا، جس میں IBLC کے لیکچرار ڈاکٹر صادق صبا نے طلباء ضمیر اورشمیم کے ساتھ مل کر شاندار گانے پیش کیے۔ اس موسیقی نے تقریب کے ماحول کو مزید خوشگوار بنا دیا۔ آخر میں ڈاکٹر محمد یٰسین نے تمام شرکاء کا شکریہ ادا کیا اور اس یادگار پروگرام کو ممکن بنانے والے طلباء کی کاوشوں کو سراہا۔ یہ پروگرام نہ صرف طلباء کی محنت اور تخلیقی صلاحیتوں کا مظہر تھا بلکہ فارغ التحصیل طلباء کے لیے ایک یادگار لمحہ بھی ثابت ہوا۔
