تربت(گدروشیاپوائنٹ) گورنمنٹ بوائز ماڈل ہائی اسکول تربت میں ڈویژنل ڈائریکٹر ایجوکیشن (سیکنڈری) مکران ڈویژن صابر علی کی زیرِ صدارت کلسٹر ہیڈز کا اجلاس منعقد ہوا۔ اجلاس میں تمام فیلڈ آفیسرز، کلسٹر ہیڈز اور دیگر متعلقہ حکام نے شرکت کی۔ ڈسٹرکٹ ایجوکیشن آفیسر کیچ امجد شہزاد بھی اجلاس میں شریک ہوئے اور شرکاء سے خطاب کیا۔ اجلاس کے دوران مختلف اہم ایجنڈا نکات پر تفصیلی غور کیا گیا۔ جن میں تعلیمی منصوبہ بندی، اسکولوں کی مانیٹرنگ، تدریسی و تعلیمی عمل میں بہتری، انتظامی امور اور فیلڈ اسٹاف کے مابین باہمی رابطہ شامل تھے۔ ڈویژنل ڈائریکٹر ایجوکیشن مکران نے مؤثر نگرانی، بروقت رپورٹنگ اور تعلیمی معیار کو بہتر بنانے کیلئے اجتماعی کاوشوں پر زور دیا۔ ڈی ای او کیچ نے اپنے خطاب میں نظم و ضبط، اسکولوں کے باقاعدہ دوروں اور محکمہ جاتی پالیسیوں کے نچلی سطح پر مؤثر نفاذ کی اہمیت کو اجاگر کیا۔ اجلاس میں شرکاء نے بھرپور انداز میں اپنی آراء اور تجاویز پیش کیں جس سے اجلاس کو نتیجہ خیز اور مفید بنایا گیا۔ اجلاس کے اختتام پر تمام افسران اور کلسٹر ہیڈز نے تعلیمی نظام کی بہتری اور اجلاس میں کیے گئے فیصلوں پر مؤثر عملدرآمد کے لیے بھرپور محنت اور ذمہ داری کے ساتھ کام کرنے کے عزم کا اظہار کیا۔
