تربت(گدروشیا پوائنٹ)یونین کونسل گوکدان کے چیئرمین نے محدود ترقیاتی بجٹ کے باوجود علاقے میں تین اہم اور بنیادی نوعیت کی اسکیمات کامیابی سے مکمل کر لی ہیں۔ مکمل ہونے والی اسکیمات میں ڈھنک میں سیوریج لائن کی تعمیر، دیہات کی آبادی کے لیے صاف پینے کے پانی کی ٹینکی کی تنصیب اور یونین کونسل گوکدان میں یوسی چیئرمین آفس کا قیام شامل ہے۔ یونین کونسل گوکدان آبادی کے لحاظ سے علاقے کی بڑی یونین کونسلوں میں شمار ہوتی ہے، جس میں گوکدان، دیہات اور ڈھنک کے دیہات شامل ہیں۔ چیئرمین نے محدود وسائل کے باوجود عوامی ضروریات کو مدنظر رکھتے ہوئے ان اسکیمات کو ترجیح دی جو براہِ راست شہریوں کی زندگی پر مثبت اثر ڈالیں۔ ڈھنک میں سیوریج لائن کی تعمیر سے نکاسیٔ آب کا دیرینہ مسئلہ حل ہونے میں مدد ملی ہے، جس سے صفائی کی صورتحال بہتر ہونے اور بیماریوں کے پھیلاؤ میں کمی کی توقع ظاہر کی جا رہی ہے۔ اسی طرح دیہات کی آبادی کے لیے نصب کی گئی پانی کی ٹینکی سے صاف پینے کے پانی کی فراہمی ممکن ہوئی ہے۔ یونین کونسل گوکدان میں یوسی چیئرمین آفس کے قیام سے مقامی سطح پر انتظامی امور میں بہتری آئے گی اور عوام کو اپنے مسائل کے حل کے لیے سہولت میسر ہوگی۔ اس موقع پر چیئرمین نے کہا کہ محدود بجٹ کے باوجود اہم اسکیمات مکمل کی گئی ہیں اور آئندہ بھی دستیاب وسائل میں رہتے ہوئے عوامی فلاح و بہبود کی اسکیمات کو ترجیح دی جائے گی۔علاقہ مکینوں نے ترقیاتی اقدامات کو خوش آئند قرار دیتے ہوئے امید ظاہر کی ہے کہ مستقبل میں بھی اسی تسلسل کے ساتھ بنیادی سہولیات کی فراہمی جاری رہے گی۔
